ازالى مۋزىكا وينالىپ, ءبىر مينۋتتىق ۇنسىزدىك جاريالاندى. جۇرتشىلىق الدىندا وبلىستىق ءماسليحاتتىڭ حاتشىسى ۆلاديمير بۋبەنكو ءسوز سويلەپ, ەلباسى نۇرسۇلتان نازارباەۆتىڭ جارلىعىمەن 31 مامىر ساياسي قۋعىن-سۇرگىن قۇرباندارىن ەسكە الۋ كۇنى بولىپ بەلگىلەنگەنىن, قىزىلجار وڭىرىنەن 7614 ادامنىڭ «حالىق جۋى» اتانىپ, ءتۇرلى جازالاۋلارعا ۇشىراعانىن جەتكىزدى. ولاردىڭ اراسىندا ۇكىلى ىبىراي, ماعجان جۇماباەۆ, سماعۇل سادۋاقاسوۆ, نىعمەت سىرعابەكوۆ, قايسار ءتاشيتوۆ, عابباس توعجانوۆ, جۇماعالي تىلەۋسين سەكىلدى ەلگە بەلگىلى جەرلەستەرىمىز بار.
«وڭىردە «پاميات» قوعامدىق قورى 14 جىلدان بەرى جۇمىس ىستەپ كەلەدى. ونىڭ باستاماسىمەن جازىقسىز جاپا شەككەن ارىستارىمىزدىڭ ەسىمدەرى جازىلعان مەموريالدىق تاقتا, باسقا رەسپۋبليكالاردان كۇشتەپ قونىس اۋدارىلعاندار مەن اشتىقتىڭ ازابىن تارتقاندارعا ارناپ ەسكەرتكىش ورناتىلدى. ناق وسى جەردە نكۆد-نىڭ ەكى قاباتتى عيماراتى بولىپ, تۇتقىنعا الىنعان جەرلەستەرىمىز وسىندا اۋىر ازاپ شەككەن.
بولاشاقتا مۋزەي اشۋدى جوسپارلاپ وتىرمىز. ونداعى ماقسات – اتا-بابا رۋحىنا تاعزىم ەتۋ, تاريحىمىزدىڭ قارالى كەزەڭىن ۇمىتپاۋ, جاستاردىڭ ەسىنە سالۋ», دەيدى «پاميات» قوعامدىق قورىنىڭ توراعاسى ساعىندىقوۆ بولات اقساقال.
ءومىر ەسقالي,
«ەگەمەن قازاقستان»
